संखुवासभा । जिल्लाको चैनपुर नगरपालिका–११ केराबारीमा भरुवा बन्दुकको छर्रा लागेर एक महिला घाइते भएकी छन् ।
चैनपुर–११ केराबारीकी ४५ बर्षीय मेनुका खतिवडा घाइते भएकी जिल्ला प्रहरी कार्यालय संखुवासभाका प्रहरी नायव उपरीक्षक घनश्याम श्रेष्ठले बताए । उनका अनुसार, गत असार ४ गते राति १२ः०५ बजेको समयमा घर नजिकै रहेको मकै बारीको टहरामा सुतिरहेकी खतिवडा भरुवा बन्दुकको छर्रा लागेर गम्भीर घाइते भएकी हुन् ।
सोमबार खाँदबारीमा पत्रकार सम्मेलन गरेर घटनाका बारेमा सार्वजनिक गरेको हो । बन्दुक पड्काएको आरोपमा प्रहरीले चैनपुर–११ का किङरिङका ३७ वर्षीय लंक तामाङ भन्ने अनिलकुमार तामाङ र तुलसी जिमीलाई लोड भएको दुई वटा भरुवा बन्दुकसहित नियन्त्रणमा लिएको प्रहरीले जनाएको छ ।
उक्त घटना असार ४ गते भए पनि असार २१ गते मात्र बाहिर आएको हो । घाइते महिलाको थप उपचारका लागि काठमाडौँ लगेपछि मात्र बाहिर आएको हो । प्रहरीले उनीहरूको साथबाट असार २२ गते एक थान बरुवा बन्दुक र ४ सय ३२ ग्राम बारुद समेत बरामद गरेको छ ।
दुम्सीलाई हानेको बन्दुकको छर्रा लागेर गम्भीर घाइते भएकी हुन् । बारीको टहरामा मकै रुँघेर सुतिरहेकी खतिवडाको ढाडको दाहिने पट्टि भरुवा बन्दुकको छर्राले लागेको छ । घाइते खतिवडाको जिल्ला अस्पतालमा उपचार हुन नसकेपछि थप उपचारका लागि काठमाडौँ लगिएको जिल्ला प्रहरी कार्यालयले जनाएको छ । छर्रा महिलासँगै कुकुरलाई समेत लागेको थियो ।
पक्राउ परेका तामाङ र जिमीलाई जिल्ला अदालत संखुवासभाबाट म्याद थप गरी मुलुकी अपराध संहिता, २०७४ बमोजिम ज्यान मार्ने उद्योग र हातहतियार खरखजना कसुरमा थप अनुसन्धान भई रहेको प्रहरीले जनाएको छ ।
भिडियो लिंक......
https://www.youtube.com/watch?v=ZZ0_AP5C_C4&t=62s
