काठमाडौं । पछिल्लो समय आर्थिक संकट झेलिरहेको श्रीलंकामा राष्ट्रव्यापी संकटकाल घोषणा गरिएको छ । चरम विदेश मुद्राको अभावसँगै महँगी बढ्नुका साथै इन्धन र विजुलीसमेत अभाव हुन थालेपछि शनिबारदेखि लागू हुनेगरी संकटकाल घोषणा गरिएको स्थानीय सञ्चारमाध्यमले उल्लेख गरेका छन् ।
श्रीलंकामा अभाव सिर्जना भएसँगै हिंसात्मक आन्दोलनसमेत सुरु भएको छ । गत बिहीबारमात्रै राजधानी कोलम्बोस्थित राष्ट्रपति गोताबाया राजापाक्षको निवासनजिकै आन्दोलनकारीले प्रदर्शन गरेका थिए ।
शुक्रबार केही प्रदर्शनकारी पक्राउ परेका छन् । बीबीसीका अनुसार संकटकाल घोषणा भएसँगै हिंसात्मक प्रदर्शनमा संलग्नलाई वारेन्टविनै पक्राउ गर्न भनिएको छ ।
ठूलो आर्थिक संकटमा गुज्रिरहेको छ श्रीलंकामा अहिले दैनिक १३ घण्टा लामो समयसम्म विद्युत कटौती हुने गरेको छ । इन्धनको अभाव छ, अत्यावश्यक खानेकुरा र औषधिको अभावका माझ जनताको आक्रोश नयाँ चरम विन्दुमा पुगेको छ ।
