संखुवासभा । संखुवासभाको मकालु गाउँपालिका–३ उवा स्थित रहेको श्री पाथीभरा आधारभूत विद्यालयमा पुस्तकालय स्थापना गरिएको छ ।
साब्लाबुङ पुस्तकालय अभियान नेपाल हङकङद्वारा ७५ हजार रुपैयाँ बराबरको ४२० थान पुस्तक प्रदान गरेर साब्लाबुङ पुस्तकालय स्थापना गरेको हो । पुस्तकालय स्थापना साब्लाबुङ पुस्तकालय अभियान संखुवासभा जिल्ला प्रतिनिधि मानदेव प्यासीको उपस्थितिमा सम्पन्न भएको हो ।
उक्त पुस्तकालय स्थापना पश्चत विद्यार्थी तथा अभिभावकहरुलाई प्रत्यक्ष सिकाईमा टेवा पुग्नुका साथै समाज परिवर्तन हुने कुरा विद्यालयका ब्यबस्थापन समितिका अध्यक्ष रोशन राईले बताए ।
उक्त कार्यक्रममा साब्लाबुङ पुस्तकालय अभियानका प्रमुख तथा साहित्यकार राजकुमार राई र श्री पाथीभरा आधारभूत विद्यालायका पुर्व प्रधानाध्यापक तथा साहित्यकार स्रस्टा मानदेव प्यासीलाई विद्यालयको तर्फबाट सम्मानपत्रद्वारा सम्मानित गरेको विद्यालयका प्रधानाध्यापक भुवनसिङ राईले बताए । विद्यालयमा पुस्तकालय स्थापना गरिदिनु भएकोमा साब्लाबुङ परिवारलाई शिक्षक अभिभावक संघ संयोजक कालुमान राईले धन्यवाद प्रकट गरेका थिए ।
साब्लाबुङ पुस्तकालय अभियान अन्तर्गत राजकुमार राईले देशभर पुस्तकालय अभियान संचालन गरिरहेका छन् । आममानिसहरुलाई पुस्तक प्रति अभिरुचि बढाउने उद्धेश्यले पुस्तकालय अभियान देशभर चलाएको उनको भनाइ छ ।
