- विकास राई
संखुवासभा । जिल्लाको चिचिला गाउँपालिका भित्रका विभिन्न योजनाहरुको स्थलगत रुपमा अनुगमन गरिएको छ ।
सोमबार चिचिला गाउँपालिकाका कार्यपालिका सदस्य तथा भौतिक पूर्वाधार समितिका संयोजक राजेन्द्र घलेले चालु आर्थिक बर्ष २०८१/८२ भित्र संचालित योजनाहरुको अनुगमन गरेका हुन् । उनले चिचिला गाउँपालिकाको वडा नं. २ भित्र संचालित योजनाहरुको स्थलगत रुपमा पुगेर अनुगमन गरेको बताए । भौतिक पूर्वाधार संयोजक घले र चिचिला २ नम्बरका वडाध्यक्ष दिनेश राई, गाउँपालिकाका प्राविधिक इन्जिनियर लगायतको टोलीले योजनाहरुको अनुगमन गरेको हो ।
२ नम्बर वडाभित्रका दिदिङमा निर्माणधीन आधारभूत स्वास्थ्य चौकी, हाडी खोलाको पुल, याफूडाँडाको बाढो ढलान, बाटो सोलिङ, गैरीआंलाको स्वास्थ्य इकाईको अवलोकन र गैरी आंलास्थित नै रहेको गिशेला सामुदायिक विकास क्लवको खेलकुद मैदानको लागि वाल निर्माण लगायतको आधा दर्जन भन्दा बढि योजनाहरुको अनुगमन गरिएको भौतिक पूर्वाधार संयोजक घलेले बताए । उनले गाउँपालिकाबाट बिनियोजित बजेटको सहि ढंगले सदुपयोग गरि राम्रो काम गर्न आग्रह गरेको बताए ।
गाउँपालिकाले आवश्यकताको आधारमा विभिन्न गाउँ ठाउँमा बजेट बिनियोजन गरिरहेको बताउर्दै राम्रो गरि गाउँको विकास गर्न सबैले आआफ्नो ठाउँबाट योगदान दिनुपर्ने संयोजक घलेको भनाइ छ । ‘राम्रो काम गर्नुहोस, अपुग भएको अवस्थामा आगामी बर्ष आवश्यकतालाई मध्यनजर गरि बजेट थप्छौं ।’—घलेले भने ।
पालिकाभित्रका कुनै पनि बाटो केन्द्र सम्म सजिलोसँग आवातजावात गर्न जोडीरहेको बताउर्दै गाउँ–गाउँका बाटो घाटो मर्मत संम्भार गरिरहेको घलेको भनाइ छ । शिक्षा, स्वास्थ्य, खेलकुद र पूर्वाधार विकास विशेष जोड दिएर काम गरिरहेको घले बताउँछन् ।
(चिचिला २ नम्बर वडाको योजनाहरु अनुगमन गर्दै भौतिक पूर्वाधार संयोजक राजेन्द्र घले र वडाध्यक्ष दिनेश राई र प्राविधिक लगायत । तस्बिर : विकास राई)
