संखुवासभा । जिल्लाको खाँदबारी नगरपालिका–७ नयाँबजार स्थित रहेको हिमालय किरणपब्लिक क्याम्पसको बहुउद्धेश्यीय भवन उद्घाटन गरि हस्तान्तरण गरिएको छ ।
बुधबार सघन शहरी तथा भवन निर्माण आयोजना धनकुटाद्धारा आयोजित कार्यक्रममा नवनिर्मित भवनको उद्घाटन गरि हस्तान्तरण गरिएको हो । उक्त भवनको प्रमुख अतिथी जिल्ला समन्वय समितिका प्रमुख सुमन शाक्यले उद्घाटन गरेका थिए ।
सघन शहरी तथा भवन निर्माण आयोजना धनकुटाको आयोजना प्रमुख सुमन मिश्रले खाँदबारी नगरपालिकाका मेयर महेश थपलियालाई सो भवन औपचारिक रुपमा हस्तान्तरण गरेका हुन् । हिमालय क्याम्पसको भवन भएपनि स्थानीय सरकारको जिम्मेवारी रहने भएकाले आयोजनाले खाँदबारी नगरपालिकालाई हस्तान्तरण गरेको हो ।
अरुणबरुण निर्माणसेवा कम्पनीले भवनको जिम्मा लिएको थियो । भ्याट सहित २ करोड ६४ लाख ७४ हजार ९६१ रुपैयाको लागतमा बनेको उक्त भवन तीन तले रहेको छ भने ८ वटा कोठा र एउटा हल छ । २०७९ साल बैशाख २ गते संम्झौता भई २०८० भदौ मसान्तमा निर्माण सम्पन्न भएको हो । संम्झौता अनुसार तोकीएको समयमा नै काम सम्पन्न गरि क्याम्पसलाई हस्तान्तरण गरेको अरुणबरुण निर्माणसेवा कम्पनीका प्रबन्ध निर्देशक मिगुर शेर्पाले बताए ।
भवनको बहुउद्धेश्य हुने ढंगले निर्माण गरिएको बताउर्दै क्याम्पसमा आवश्यकता अनुसार भौतिक संरचनाहरु थप गर्ने क्रममा एउटा भवन थपिएको हिमालय किरण पब्लिक क्याम्पसका प्रमुख डा.मातृकाप्रसाद तिम्सिनाले बताए ।
उक्त क्याम्पसमा स्नातकोत्तर तह सम्म पठनपाठन हुने गर्दछ ।
