काठमाण्डौ – नेकपा माओवादी केन्द्रसँग पार्टी एकता गर्ने नीतिगत निर्णयसँगै नेकपा एकीकृत समाजवादी फुट नजिक पुगेको छ । हिजो बसेको केन्द्रीय कमिटीले माओवादी केन्द्रसँग एकता गर्ने नीतिगत निर्णय गरेपछि त्यसमा असहमति जनाउँदै आज वरिष्ठ नेता झलनाथ खनाल, महासचिव घनश्याम भुसाललगायत नेताले छुट्टै भेला गरेका हुन् ।
भेलाले महासचिव भुसालको संयोजकत्वमा नयाँ दल खोल्ने तयारी गरेको बताइएको छ । बैठकमा खनाल र भुसालसहित उपाध्यक्ष घनेन्द्र बस्नेत, उपमहासचिव विजय पौडेल, स्थायी कमिटी सदस्य जीवनराम श्रेष्ठ, रामकुमारी झाँक्री, हरि पराजुलीलगायत सहभागी थिए ।
माओवादी केन्द्रसँग एकताको विपक्षमा रहेका नेताहरु नेकपा एमालेसँग पनि संवादमा रहेको संचारकर्मीसँग कुरा गर्दै नेता खनालले बताउनुभएको छ । उहाँले कुरा मिलेमा एमालेमा जानु नौलो कुरा नहुने बताउनुभयो ।
२०७८ साल भदौमा एमालेबाट विभाजन भई माधवकुमार नेपालको नेतृत्वमा नेकपा एकीकृत समाजवादी गठन भएको थियो । २०७९ सालको चुनावमा प्रतिनिधिसभामा १० सिट ल्याए पनि राष्ट्रिय पार्टी बन्न भने सकेन ।
