संखुवासभा । संखुवासभा सम्पर्क परिवार दक्षिणकोरियाद्धारा धर्मदेवी नगरपालिका–८ का मृगौला पिडीत देवीकुमार जिमीको उपचारको लागि नगद सहयोग गरेको छ ।
दक्षिणकोरिया समाजले जिमी बसोबास गरिरहेको काठमाडौं स्थित मनमैजुमा नै पुगेर नगद ६२ हजार रुपैया नगद सहयोग गरेको संखुवासभा सम्पर्क परिवार दक्षिणकोरियाका अध्यक्ष बमबहादुर घलेले बताए । उनको अनुसार, दुवै मृगौला फेल भई उपचार गराईरहेको जिमीलाई बिहिबार नगद सहयोग गरेको हो । बिरामीलाई दक्षिणकोरियाका पूर्वअध्यक्षद्धय गणेश घिमिरे र रेखबहादुर गुरुङ घरैमा पुगेर रकम हस्तान्तरण गरेका थिए ।
संखुवासभाबाट प्रवास दक्षिणकोरिया रोजगारीको सिलसिलामा पुगेका संखुवासभालीहरुबाट आर्थिक सहयोग संकलन अभियानवाट संकलित सहयोग रकम बिरामीलाई हस्तान्तरण गरिएको हो । जिमी विगत लामो समयदेखी दुवै मृगौलामा समस्या देखिएकोले काठमाडौस्थित हिमाल अस्पतालमा उपचार गराईरहेका छन् ।
सन् २०१२ सालमा स्थापना भएको संखुवासभा सम्पर्क परिवार दक्षिणकोरियाले दैवीप्रकोप, दिनदुःखी र बिरामीहरुलाई सहयोग गर्दै आएको छ । उक्त संस्थाले विभिन्न किसिमको मानवीय सहयोगहरु गर्ने गरेको छ । विगतमा पनि उक्त समाजले संखुवासभाको कोरोनाकाल, बाढिपहिरो, बिरामीको उपचार सहयोग लगायत दर्जनौं क्रियाकलापहरु प्रत्यक्ष सहयोग गर्दै आएको थियो ।
