संखुवासभा । पूर्वी पहाडी तथा हिमाली जिल्ला संखुवासभाको पवित्र धार्मिक तीर्थस्थल ‘बरुण नदी बचाउ अभियान’ मा सरोकारवालाहरु अघि बढेका छन् ।
संखुवासभाको भोटखोला गाउँपालिका–४ मा रहेको ऐतिहासिक धार्मिक महत्व बोकेको वरुण नदीबाट विद्युत् उत्पादन गर्ने भएपछि स्थानीय सरोकारवालाहरु ‘बरुण नदी बचाउ अभियान’मा जुटेका हुन् । हिन्दु र बौद्धहरुको धार्मिक तीर्थस्थल मानिने बरुण नदीमा विद्युत् उत्पादन गर्न लागेपछि त्यसको विरोधमा स्थानीय तथा सरोकारवालाहरु बरुणलाई ‘भर्जिन’ राख्नुपर्ने माग सहित अघि बढेका हुन् ।
हिमालय भोटे समाजका अध्यक्ष मिथुन भोटेले कुनै पनि हालतमा बरुण नदीमा जलविद्युत् बनाउन नहुने बताए । उनले बरुण जस्तो पवित्र नदीमा हाइड्रोपावार बनाउँदा त्यहाँका स्थानीय आदिवासी जनजातिको उद्गमस्थल मासिनुका साथै धार्मिक तथा सांस्कृतिक पहिचान माथिको ठाडो आक्रमण भएको बताए ।
हिमालय भोटे समाज बरुण नदी बचाउ अभियानमा लागि रहेको अध्यक्ष भोटेको भनाइ छ । उक्त समाजले आदिवासी जनजाति आयोग पुल्चोक ललितपुरमा गत ४ साउनमा निवेदन पेश गरेका थिए । आयोगका अध्यक्ष रामबहादुर मगरको अध्यक्षतामा ८ भदौमा बसेको बैठकले बरुण नदीमा विद्युत् उत्पादन गर्न प्रस्तावित १३२ मेगावाटको इमपीक इनर्जी प्रालिले संचालन अनुमति प्राप्त गरेपनि तत्काल काम नगर्न/नगराउन भनी ऊर्जा, जलस्रोत तथा सिंचाई मन्त्रालयमा पत्राचार गरेको छ ।
बरुण नदी बचाउ अभियानमा हिमालय भोटे समाजका साथै उत्तरमान राई अध्यक्ष रहेको बरुणधाम संरक्षण नागरिक समिति, सोनाम भोटे संयोजक रहेको भोटे राष्ट्रिय मुक्ति मोर्चा र लाक्पा आङजुक सिङसावा (ल्होमी सिङ्सा कल्याण केन्द्र) लगायतका भोटखोलाका विभिन्न सराकोरावाला समुहहरु लागि रहेका छन् । उनीहरुले स्थानीय वडा सरकार देखि स्थानीय तह हुदैं जिल्ला समन्वय समितिमा समेत निवेदन पेश गरेका छन् । जिल्ला समन्वय समिति ४ साउनमा ऊर्जा, जलस्रोत तथा सिंचाई मन्त्रालयमा बरुण नदीलाई भर्जिन राख्नुपर्ने धारणा पत्राचार गरेको थियो । स्थानीय तह देखि प्रदेश सरकार हुदैं केन्द्रीय सरकारका विभिन्न तहसम्म पुगेर बरुण नदीमा जलविद्युत् उत्पादन गर्न नहुने भनी माग गर्दै आएका छन् ।
