संखुवासभा । जिल्लाको सदरमुकाममा रहेको खाँदबारी नगरपालिकाको नयाँ प्रमुख प्रशासकीय अधिकृतको रुपमा निर्माणकुमार कार्की आएका छन् ।
यसअघिका प्रमुख प्रशासकीय अधिकृत युवराज आचार्य सरुवा लिएर ललितपुरको कोन्ज्योसोम गाउँपालिकाको प्रमुख प्रशासकीय अधिकृतमा गएपछि रिक्त रहेको प्रमुख प्रशासकीय अधिकृतको ठाउँमा कार्की आएका हुन् ।
बुधबार खाँदबारी नगरपालिका मेयर महेश थपलिया र उपमेयर महेश्वरा श्रेष्ठ बज्राचार्य र कार्यपालिका सदस्यहरु, कर्मचारीहरु लगायत नगरपालिकाको सिंगो टिमले पूराना कार्यालय प्रमुख आचार्यको बिदाई र नयाँ कार्यालय प्रमुख कार्कीको स्वागत एउटै कार्यक्रमको आयोजना गरि सम्पन्न गरेका थिए । जानेलाई बिदाई र आउनेलाई स्वागत एउटै कार्यक्रममा गरिएको नगरपालिकाको भनाइ छ । सरुवा लिएर गएका आचार्यलाई नगरपालिकाको सिंगो टिमको तर्फबाट विभिन्न बिदाईका उपहारहरु समेत प्रदान गरेका थिए ।
खाँदबारी नगरपालिकाको मेयर महेश थपलियाले यो नियमित प्रक्रिया भएकाले जाने र आउने दुवै जनालाई कार्यसफलताको शुभकामना ब्यक्त गर्दै राष्ट्रसेवक कर्मचारीको भूमिकामा अब्बल रहन आग्रह गरे ।
तत्कालीन प्रमुख प्रशासकीय अधिकृत आचार्यलाई खाँदबारी नगरपालिका १ नम्बर वडा कार्यालयको तर्फबाट समेत कार्यालयमा निमन्त्रणा गरी बिदाई गरेका थिए । १ नम्बर वडाका वडाध्यक्ष निरन्जन श्रेष्ठ र वडा कार्यसमितिको तर्फबाट बिदाईका उपहार सहित कार्यालय प्रमुख आचार्यको बिदाई गरेका थिए ।
आचार्यले १५ महिना खाँदबारी नगरपालिकाको प्रमुख प्रशासकीय अधिकृतको रुपमा कार्यभार सम्हाले भने ६ महिना जिल्ला समन्वय समिति संखुवासभाका समन्वय अधिकारीको समेत भूमिका निर्वाह गरेका थिए ।
खाँदबारी नगरपालिकाको नयाँ प्रमुख प्रशासकीय अधिकृतको रुपमा आएका कार्की नेपाल सरकारका उपसचिव हुन् । उनी भूमि सुधार मन्त्रालयबाट खाँदबारी सरुवा भई आएका हुन् । यसअघि उनी जिल्ला समन्वय समिति संखुवासभाका समन्वय अधिकारीको रुपमा २६ महिना काम गरेर मन्त्रालय गएका थिए । खाँदबारीका स्थानीय समेत रहेका कार्की ०५४ सालमा सरकारी सेवा प्रवेश गरेका हुन् । उनीसँग पर्यटन, महिला बालबालिका र भौतिक पूर्वाधार लगायतका मन्त्रालयहरुमा काम गरेको अनुभव छ ।
