संखुवासभा । मुख्यमन्त्री केदार कार्की सरकारले कोशी प्रदेशमा मन्त्रीमण्डल विस्तार गरेका छन् । शुक्रबार उनले चार मन्त्री र दुई राज्यमन्त्री नियुक्त गरेका छन् ।
जसमा संखुवासभा निर्वाचन क्षेत्र १ बाट प्रत्यक्ष निर्वाचीत राजेन्द्र कार्की सामाजिक विकास मन्त्री नियुक्त भएका छन् । माओबादी केन्द्रबाट मन्त्री नियुक्त भएका कार्की यसअगाडी कांग्रेसका उद्धव थापा नेतृत्वको सरकारमा विना विभागीय मन्त्री नियुक्त भएका थिए तर काम गर्न नपाई सरकार ढलेको थियो ।
नेपाली कांग्रेसबाट प्रदिपकुमार सुनुवार र रामकुमार खत्रीलाई मन्त्री बनाएका छन् । सुनुवारले स्वास्थ्य र खत्रीले उद्योग कृषि तथा सहकारी विकास मन्त्रालयको जिम्मेवारी पाएका छन् ।
माओवादी केन्द्रबाट संखुवासभाका राजेन्द्र कार्कीका साथै नारायण मगर मन्त्री बनेका छन् । मगरले खानेपानी, सिँचाइ तथा उर्जा मन्त्रालयको जिम्मेवारी पाएका छन् ।
आर्थिक मामिला तथा योजना राज्यमन्त्रीमा इन्दिरा थापा र आन्तरिक मामिला तथा कानुन राज्यमन्त्रीमा सुनिता कुमारी गुरूङ नियुक्त भएका छन् । उनीहरु दुवै कांग्रेसका हुन् ।
वर्तमान सरकारमा आन्तरिक मामिला तथा कानुनमन्त्रीमा शम्शेर राई, पर्यटन, वन तथा वातावरण मन्त्रीमा गणेश उप्रेती र भौतिक पुर्वाधार विकासमन्त्रीमा कमलप्रसाद जबेगु मन्त्री छन् ।
६ जना थपिएपछि कोशीको मन्त्रीपरिषद् संख्या १० पुगेको छ । ४ महिना पछि मन्त्रीपरिषद बिस्तार भएको हो ।
