- मोहनकुमार राई
संखुवासभा । पदमकुमार श्रेष्ठद्धारा लिखित पुस्तक ‘अर्को जन्म’ को विमोचन गरिएको छ ।
विहिबार चैनपुर नगरपालिकाको दिलकुुमारी भवनमा पुस्तक विमाचन कार्यक्रमको आयोजना गरिएको थियो । विमोचन कार्यक्रममा उक्त पुस्तकका सम्पादक एकु घिमिरेले पुस्तक भित्र कहाली लाग्दो हवाई दुघटनासँगै संस्कृति, इतिहास, भूगोल, समाज, कृषि र शिक्षा जस्ता थुपै्र पाटाहरुलाई समेटेको बताए । विमोचित ‘अर्को जन्म’ कृति मौलिक र पृथक शैलीमा पुस्तकको आकार पाएको समेत घिमिरेको भनाइ थियो । उक्त पुस्तकको प्रकाशक श्रीमती निरमाया श्रेष्ठ रहेकी छिन् ।
पुस्तक साहित्यिक नभएर संस्मरणात्मक भएकाले जीवनका घटनाक्रमलाई सरसर्ती पस्कने काम गर्दै विश्वसनियताका लागि केही प्रमाणहरु समेत पुस्तकमा समावेश भएको जनाएको छ । २०४१ सालमा संखुवासभाको तुम्लिङ्गटार विमानस्थलबाट काठमाण्डौका लागि उडेको जहाज भोजपुरको चप्लेटीमा दुर्घटनामा परि नयाँ जीवन पाएका श्रेष्ठले जीवनको अनुभूतिसँगै कृषि, समाज र शिक्षा जस्ता क्षेत्रमा समेत आफ्नो पुस्तकमा उल्लेख गरेको पाइन्छ । पुस्तकमा लेखक स्वंयले निकै सरल, आकर्षक, सुन्दर भावशैलीमा दुर्घटनाको बयानको अतिरिक्त बाल्यकालिन जीवनयात्राको भोगाइ, संस्कृति र कृषिसँग सम्बन्धित कफी खेतीको प्रसंगले श्रेष्ठको लेखन कलाप्रतिको अभिरुचिलाई प्रस्ट्याउँछ ।
चैनपुर समाज सेवा युवा क्लवद्धारा आयोजित उक्त पुस्तक विमोचन कार्यक्रममा क्लवका तर्फबाट उमेशकुमार शाक्य, संखुवासभा बहुमुखी क्याम्पसका सहायक क्याम्पस प्रमुख चन्द्रमणि दाहाल, रामेश्वर क्याम्पसका प्राध्यापक सुरेश रिमाल र शारदा माध्यमिक विद्यालय त्रिशुलेका प्रअ रविन्द्र नेयोङ्ग लगायत थुप्रै वक्ता तथा सर्जकहरुले लेखक तथा पुस्तकको वारेमा चर्चापरिचर्चा गरेका थिए ।
