संखुवासभा । राष्ट्रिय योग दिवसको अवसरमा खाँदबारी नगरपालिकाको वडा तह सम्म योग अभ्यास हुने भएको छ ।
जिल्ला योग समन्वय समिति संखुवासभाको आयोजनामा खाँदबारी नगरभित्रका ११ वटै वडामा योग, ध्यान र प्रणायम सञ्चालन गर्ने जिल्ला योग समन्वय समितिले मंगलबार खाँदबारीमा पत्रकार सम्मेलन मार्फत जानकारी गराएको छ । जिल्लामा क्रियाशील योग, ध्यान, प्रणायम र सत्सङ हुँदै आध्यात्मिक जागरणको क्षेत्रमा काम गर्दै आएका विभिन्न संस्थाहरुको समन्वयमा सप्ताहव्यापी योग, ध्यान, प्रणायम गर्न लागिएको जिल्ला योग समन्वय समितिका अध्यक्ष भिमबहादुर कट्टेलले जानकारी दिए ।
योग र ध्यानलाई गाउँ, टोल, समुदाय हुँदै घर–घर र व्यक्ति–व्यक्ति सम्म पु-याउन राष्ट्रिय योग दिवसको अवसरमा योग सप्ताहको आयोजना गरिएको अध्यक्ष कट्टेलले बताए ।
योग सप्ताह कार्यक्रम पौष २४ गतेबाट माघ १ गते सम्म सञ्चालन हुनेछ । २४ गतेबाट २९ गते सम्म वडा स्तरमा र माघ १ गते राष्ट्रिय योग दिवसका दिन जिल्ला समन्वय समिति संखुवासभाको हलमा योग, ध्यान सहित योग दिवस मनाइने अध्यक्ष कट्टेलले बताए ।
उक्त पत्रकार सम्मलेनमा ब्रम्हाकुमारी राजयोग सेवाकेन्द्र खाँदबारीकी रचना आचार्य, ओशोसन्यासी योगी क्षितिज बराल, पतञ्जलीकी डेगेश्वरी श्रेष्ठ लगायतले कार्यक्रमका बारेमा जानकारी गराएका थिए । योग, ध्यान, प्रणायम, सत्सङको माध्यमबाट सकारात्मक सोचको विकास गर्दै शारिरिक र मानसिक धेरै रोगहरु निःशुल्क र प्राकृतिक उपचार गर्न सकिने उनीहरुको भनाइ छ ।
पौष २४ गते खाँदबारी नगरपालिका वडा नं. ७ र ८, २५ गते वडा नं. १० र ११, २६ गते वडा नंं. २ र ६, २७ गते वडा नं. ९, पौष २८ गते वडा नं. ४ र ५, त्यसैगरी २९ गते वडा नं. ३ मा योग, ध्यान गराइने जिल्ला योग समन्वय समितिले जनाएको छ ।
संखुवासभामा २०७९ माघ १ गते देखि राष्ट्रिय योग दिवस मनाउन सुरु गरिएको हो । त्यसैको निरन्तरता स्वरुप बर्सेनि विभिन्न कार्यक्रमहरु संचालन हुदैआइरहेको छ ।
