संखुवासभा । जिल्लाको खाँदबारी नगरपालिका–४ पांमा स्थित भगीवन्त रंगशालामा आजबाट शुरु हुन लागेको सातौ पांमा कप फुटबल प्रतियोगिताको सम्पूर्ण तयारी पूरा भएको छ ।
‘स्वास्थ्यको लागि खेलकुद : राष्ट्रको लागि खेलकुद’ भन्ने नारासहित किराँतहरुको महानपर्व उधौली तथा धान्यपूर्णिामाको अवसरमा फुटबल प्रतियोगिताको आयोजना गरिएको हो ।
प्रतियोगिताको आज ११ बजे एक भब्य कार्यक्रम वीच खाँदबारी नगरपालिकाका मेयर महेश थपलियाले उद्घाटन गर्ने कार्यक्रम रहेको प्रतियोगिता संयोजक ध्यानसिंह राईले बताए । उनले आज देखी शुरु भई ११ गतेसम्म प्रतियोगिता संचालन हुने प्रतियोगिता संयोजक राईले बताए ।
उनको अनुसार, सिक्किम लगायत कोशी प्रदेश भित्रका विभिन्न जिल्लाका १२ क्लबको सहभागीता रहनेछ ।
फुटबल खेलको विकास, आधुनिकीकरण र खेलाडीको व्यावसायीकरण गर्ने उद्धेश्यले फुटबल प्रतियोगितालाई विगतमा जस्तै निरन्तरता दिइएको लोहोरुङ क्लबका महासचिव छत्रमणि काफ्लेले बताए । किराँतहरुको बाहुल्यता रहेको पांमाको परिचय र प्रचारप्रसारका लागि प्रतियोगिता गरिएको उनले बताए । प्रतियोगिता लोहोरुङ क्लबले आयोजना गरेको हो ।
पुस ११ गते फाइनलको दिन मंसिरे ढाडे बजार समेत लाग्ने भएकाले किराँतहरुको साँस्कृतिक कार्यक्रम साकेला नृत्य लगायतका विभिन्न प्रस्तुतीहरु रहनेछ भने हेलिकप्टरद्धारा तीर्थयात्रा सभापोखरी, शिवधारा लगायतका क्षेत्रहरुको समेत दर्शन गराइनेछ ।
प्रतियोगिताका बिजेताले नगद १ लाख ५१ हजार र उपबिजेतालेनगद ८१ हजार, मेडल, ट्रफी र प्रमाणपत्र प्राप्त गर्नेछन् । भने सेमिफाईनलमा पुग्ने २ टिमले जनही २५/२५ हजार मेडल, ट्रफी र प्रमाणपत्र प्राप्त गर्ने आयोजकको भनाइ छ ।
