संखुवासभा । जिल्लाको खाँदबारी नगरपालिका—४ सेकाहाको भ्याङखोलामा रुपलामा पार्क उद्घाटन गरिएको छ ।
शनिबार एक कार्यक्रम बीच खाँदबारी नगरपालिका ४ का वडाध्यक्ष विनोदसुब्बा गुरुङ र तमू ह्युल छोजधीं गुरुङ राष्ट्रिय परिषदका केन्द्रीय सचिवालय सदस्य तथा कोशी प्रदेश इन्चार्ज केशरमान गुरुङले संयुक्त रुपमा उद्घाटन गरेका हुन् । कोरङ्गी लामा गुरुङहरुको पूर्खा रुपलामा गुरुङको मूर्ति स्थापना गरि पार्क समेत निर्माण गरि ‘रुपलामा पार्क’ नामाकरण गरि उद्घाटन गरिएको हो ।
उक्त उद्घाटन कार्यक्रममा कोरङ्गी लामाका पुर्खाहरु, समितिका पदाधिकारीहरु, जनप्रतिनिधीहरु, समाजसेवी, भद्रभलादमी, कलाकार, पत्रकार, सुरक्षाकर्मी, टोल विकास संस्थाका पदाधिकारीहरु लगायतको उपस्थिती रहेको थियो । कार्यक्रममा कोरङ्गीहरुको पितृ पूजा, सहयोगी दाताहरुलाई सम्मान र स्थानीय तथा राष्ट्रिय कलाकारहरु सांगितिक कार्यक्रमको समेत आयोजना गरेको थियो । कार्यक्रमका कलाकारहरु उमङ्ग लामा, कुसुम गुरुङ, पवित्रा गुरुङ, दिनेश गुरुङ लगायतले सांगितिक कोशेली प्रस्तुत गरेका थिए ।
भ्याङखोलामा पार्क निर्माण गरिएपछि आन्तरिक तथा बाह्य पर्यटकहरुको लागि पर्यटकीय केन्द्र समेत बन्न थालेको छ । आजभोली पार्कमा घुमफिर गर्न र फोटो खिच्न आउनेहरुको भीड लाग्न थालेको छ ।
रुप लामा पार्क निर्माणमा कुल ७ लाख ५० हजार रुपैया खर्च भएको जनाएको छ । जसमा खाँदबारी ४ नं. वडा कार्यालयबाट १ लाख ५० हजार रुपैया र देशविदेशमा रहेका कोरङ्गी लामाहरुबाट सहयोग रकम ६ लाख रुपैया संकलन गरि पार्क निर्माण गरिएको हो ।
