संखुवासभा । संखुवासभाका कवि धर्मराज चापागाईंको कविता संग्रह ‘सुधावृष्टि’ लोकार्पण भएको छ ।
बुधबार जिल्ला समन्वय समिति संखुवासभाको आयोजनामा एक कार्यक्रम बीच कवि धर्मराज चापागाईंद्वारा लिखित छन्दोवद्ध कविता संग्रह ‘सुधावृष्टि’ लोकार्पण गरिएको हो । जिल्ला समन्वय समिति संखुवासभाका प्रमुख सुमन शाक्यको अध्यक्षतामा भएको कार्यक्रममा संखुवासभाका प्रमुख जिल्ला अधिकारी ध्रुव बहादुर खड्काको बिशेष आतिथ्य रहेको थियो ।
कार्यक्रममा भोटखोला गाउँपालिकाका अध्यक्ष वाङछेदर भोटे लगायत जनप्रतिनिधिहरु, कर्मचारीहरु, साहित्यकारहरु, साहित्यप्रेमीहरु, पत्रकार लगायत लगायतको उपस्थिती रहेको थियो । कार्यक्रममा पुस्तकका लेखक चापागाईंलाई विभिन्न वक्ताहरुले क्रमागत रुपमा समिक्षात्मक शुभकामना दिएका थिए । कार्यक्रममा मकालु साहित्य समाजका अध्यक्ष, प्राध्यापक एवम् साहित्यकार ताराबहादुर बुढाथोकी, कृष्ण चापागाई, डा.मातृकाप्रसाद तिम्सिना लगायतका वक्ताहरुले समिक्षात्मक टिप्पणी गरे । कार्यक्रम साहित्यकार एवम् प्राध्यापक राजेन्द्र सर्वहारा निरौलाले सञ्चालन गरेका थिए ।
सभापोखरी गाउँपालिका–१ धुपू निवासी कवि, पूर्वशिक्षक एवम् नेपाल पत्रकार महासंघ संखुवासभाका पूर्वसदस्य समेत रहेका चापागाईंले उक्त कविता संग्रहमा २९ वटा छन्दोवद्ध कविता समावेश गरेका छन् । सो पुस्तकमा शार्दूलविक्रीडित छन्दका १६ वटा, वसन्ततिलका छन्दका ४ वटा, इन्द्रवज्रा छन्दका ४ वटा, अनुष्टुप छन्दका २ वटा, मन्दाक्रान्ता छन्दका २ वटा र शिखरिणी छन्दको एउटा कविता रहेको छ ।
