संखुवासभा । विभिन्न मुद्धामा प्रहरीको खोजीमा रहेका संखुवासभाका एक फरार अभियुक्त पक्राउ परेका छन् ।
चिचिला गाउँपालिका–३ ढोलबाजे टोल बस्ने ३५ बर्षीय विकास राईलाई पक्राउ गरिएको जिल्ला प्रहरी कार्यालय संखुवासभाका प्रहरी निरिक्षक रामकुमार लामिछानेले बताए । प्रतिबन्धित गाँजा विक्रिवितरण गर्ने सुचनाको आधारमा खोजतलास गर्दै जाँदा १ किलोग्राम ४५६ ग्राम गाँजा सहित खाँदबारी नगरपालिका–७ नमुना टोलबाट आइतबार राती ९ः२० बजेको समयमा पक्राउ परेको प्रहरीले जनाएको छ ।
विभिन्न सार्वजनिक मुद्धा र अपराधमा संलग्न रहेका राईले पछिल्लो समयमा मानिसहरुलाई कुटपिट गर्ने, ब्यक्तिगत सम्पत्तिहरु तोडफोड गर्ने र खाँदबारी, चिचिला लगायतका क्षेत्रमा प्रतिबन्धित गाँजा विक्रिवितरण गर्ने लगायतका कामहरु गर्ने गरेको प्रहरीमा सुचना आएको प्रहरीको भनाइ छ ।
०६७ सालमा प्रतिवादी राईले संखुवासभाका एक पत्रकारलाई मरणासन्न हुने गरि कुटपिट समेत गरेका थिए । प्रहरीको अनुसार, राई ०६५ साल देखि हालसम्म बर्सेनि सार्वजनिक मुद्धा, ज्यान मार्ने उद्योग मुद्धा र लागुऔषध कारोबार गर्ने लगायतको मुद्धा गरि ९ वटा मुद्धा दायर भएको अभिलेखमा पाइएको जिल्ला प्रहरी कार्यालय संखुवासभाले जनाएको छ ।
प्रतिवादी राईलाई लागुऔषध (नियन्त्रण) ऐन २०३३ थप अनुसन्धान भईरहेको प्रहरीको भनाइ छ ।
