संखुवासभा । पाँचखपन नगरपालिका वडा नं. ७ को वडासभा सम्पन्न भएको छ । शनिबार बिहिबारे सामुदायिक सभाहलमा ७ नम्बर वडाको वडासभा सम्पन्न भएको हो ।
पाँचखपन नगरपालिकाका नगर प्रमुख विपीन राईको प्रमुख आतिथ्य तथा प्रमुख प्रशासकीय अधिकृत मणिराम खतिवडाको विशिष्ट आतिथ्यतामा भएको कार्यक्रममा वडा अध्यक्ष सन्तोष वस्नेतले आगामी आर्थिक वर्ष २०८२/०८३ का लागि नीति तथा कार्यक्रम प्रस्तुत गरेका थिए ।
नीति तथा कार्यक्रम प्रस्तुत गर्दै वडामा विनियोजन हुने बजेटबाट ३० प्रतिशत रकम शिक्षामा लगानी गर्ने उल्लेख गरिएको छ । उक्त कार्यक्रममा जग्गादाता, वडाका उत्कृष्ट शिक्षक, महिला स्वयमसेविका लगायतलाई सम्मान गरिएको थियो । वडा नं. ७ का उत्कृष्ट शिक्षक गोबिन्दबहादुर श्रेष्ठलाई घोषणा गरी सम्मान गरिएको हो । पाँचखपन–६ का श्रेष्ठ जलजला माध्यमिक विद्यालय बिहिबारेका शिक्षक हुन् ।
सोही दिन वडा नं. ७ पूर्ण खोप घोषणा र सोही वडाका द्वन्दकालमा बिस्थापित परिवारका सदस्य खोजीका लागि अन्तरक्रिया कार्यक्रमसमेत आयोजना गरिएको थियो । कार्यक्रममा पाँचखपन–७ का बेपत्ता नागरिक खोजीका लागि नेपाल आदिवासी जनजाति पत्रकार महासंघ सङ्खुवासभाले सहजिकरण गर्ने जिम्मेवारी लिएको थियो ।
